وصفات ساهلة وبسيطة باش تهناو من الكرش
كاينين بزاف ديال الوصفات الساهلة والبسيطة للناس اللي كا يبغيو يضعافو وينقصو الوزن ويتخلصو من الشحمة، خاصة فالكرش. يمكن ليكم تشربو كل صباح نص كاس ديال الما سخون مع عصير ديال حامضة، نص ساعة قبل الفطور. يمكن تديرو الحليب مغلي مع الربيع أو القزبر، واخا المذاق ماشي زوين بزاف ولكن الفعالية مضمونة. الزعتر تا هوا كا يحيد الكرش. ومن الأفضل توقفو الماكلة من بعد السبعة ديال العشية باش تعطيو الجسم ديالكم مساحة فين يهضم الماكلة ديال النهار، ويخفض نسبة الأنسولين فالدم وبالتالي يحارب المخزون ديال الشحوم اللي عندكم ونتوما ناعسين.
يمكن ليكم أيضا تاكلو تفاحة قبل الغدا ولا العشا مباشرة حيت غا تسد ليكم الشهية ديال الماكلة وتخليكم تاكلو أقل، حيت كا تشبع وفنفس الوقت ما فيهاش بزاف ديال ليكالوري. نفس الشي يمكن تديروه مع الما. وتبدلو التفاحة بكاس كبير ديال الما قبل من الوجبة ديالكم. هاد الطريقة كا يكون عندها فعالية كبيرة مع الوقت.
ممكن تديرو البزار فالوجبات ديالكم حيت مضاد للشحوم تا هوا. وتقدرو تاكلو فطبسيل صغير نفس الكمية اللي كا تديرو فطبسيل كبير غير نتوما غا يبان ليكم الصغير فيه بزاف ديال الماكلة. وهادا ميساج زوين للدماغ كا يخليكم ما تاكلوش بزاف. ونفس الميساج كا يوصل للدماغ ملي كا تحكو سنانكم فالليل، حيت كا تقولو مع راسكم صافي ما غا نبقاوش ناكلو حيت غسلنا سناننا وبغينا نحافظو على انتعاشة الفم ديالنا بفضل معجون الأسنان.
