مرجان طلق خدمة التوصيل السريع
“مرجان” طلق واحد الخدمة زوينة بزاف وغا تصلاح لبزاف ديال الناس وتوفر عليهم بزاف ديال الوقت وتمارة. اليوم، وليتي تقدر تدخل للتطبيق ديالو وتتقدى كلشي داكشي اللي بغيتي ويوصلك عن طريق “كاليكس”، اللي هيا شركة كا تشبه “غلوفو” وكا تدير نفس الخدمة ديالها، غير هيا مغربية.
هاد الخدمة بداتها محلات مرجان غير فالدار البيضا، وغادية تعممها من بعد على مدون أخرى. وكا تسمح ليك مثلا تتقدى للوالدة ديالك وهيا جالسة فدارها، وتجيها السلعة حتى لعندها. هاد الخدمة كا يستعملوها بزاف الناس اللي فالخارج اللي كا يتقداو بيها لعائلاتهم، خاصة أنها كا تميز بالسهولة ديالها وما فيهاش قوة التبرزيط.
هاد الخدمة كا تخليك على تواصل دائم مع مرجان اللي كا يتصلو بيك باش يقولو ليك إيلا كانت شي سلعة طلبتيها ما كايناش أو معطلة. كا تفاهم معاهم على موعد التوصل بالسلعة ديالك وطريقة الدفع اللي تقدر تكون من بعد التوصيل أو من خلال الأداء الإلكتروني فلابليكاسيون.
المهم جربوها وردو علينا لخبار.
