ما خبيناش عليكم

قهاوي كازا رفعات الأثمنة

بزاف ديال القهاوي والريسطورات فكازا طلعات الأثمنة ديالها من بعد رمضان. كلشي بغا يعوض الخسارة ديال السدان على ظهر الكليان، خاصة من بعد الإقبال ديال الناس ومن بعد ما فتحات الحكومة عليهم وخلات الحجر الليلي حتى الحداش ديال الليل.

القهوة اللي كانت دايرة 15 درهم ولات ب25 درهم والفطور ديال 50 درهم ولا ب80، خاصة فبعض القهاوي اللي كاينة فعين الدياب، واللي كلات العصا مزيان، علما أن أغلبيتها كا يخدم مزيان غير فالصيف وكا ينش الدبان فالشتا والخريف حيت الناس ما كا تخرجش حدا البحر بسبب البرد.

صحاب القهاوي بانت ليهم هادي هي الطريقة اللي يقدرو يعوضو بيها واخا جزء صغير من الخسارة ديالهم، من بعد ما نزلات عليهم الدولة بالضرائب وما عقلاتش عليهم، لدرجة أن عدد كبير منهم سد بيبانو وجرا على الخدامة، واعتابرو أن ما فيها باس الكليان يضحي شوية بشي دريهمات في سبيل التضامن والتكافل اللي معروفين بيه المغاربة.

صحاب القهاوي والريسطورات معولين أيضا على وصول صحاب برا، جاليتنا في الخارج، باش ينعشوا المداخيل ديالهم.

 

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى