كلنا كائنات خبزية… ولكن واش عارفين خطورة الخبز على صحتنا؟
المغاربة خبزيين. كا ياكلو الخبز فالفطور وفالغدا وفالعشا، وحتى فالكاسكروت. ولكن راهم ما عارفينش خطورة الخبز على صحتهم، خاصة الناس اللي مراض بالسكر. كا ندوزو من حدا شي مخبزة وكا نشمو ريحة الخبز وكا تجينا الهوايش. كا نبقاو نكيلو منو الشكال واللوان ونقدرو نضربو النص ديال الخبزة غير فالطريق، خاصة إيلا كانت باقا سخونة. ولكن أطونسيون. آجيو نوقفو شوية مع آش تا يقولو الخبراء ديال الصحة والتغذية على الخبز. قاليك نعام آ لالة نعام آ سيدي، من الأفضل لينا نقللو الاستهلاك ديالنا من الخبز حيت فيه بزاف ديال ليكالوري. وحتى يلا ما قدرناش نقاومو الرغبة ديالنا خاصنا نختارو نوعية أقل ضررا ديال الخبز، فحال الخبز المصنوع من القمح الكامل أو من الحبوب (الأرز، الشوفان، الكينوا، الذرة…) والابتعاد تماما على الخبز المصنوع من الدقيق الأبيض. وكا يبقى خبز الزرع، اللي كا يكون لونو قريب للكحل، أحسن أنواع الخبز للصحة، لأنه ما فيهش بزاف ديال السكر وعامر بالبوتاسيوم والكالسيوم والحديد. خبز الشوفان تا هوا مزيان.
عشاق “الباريزيان” يمكن ليهم يتناولوه ويحيدو شهوتهم منو، ولكن غير بكميات قليلة، خاصنا نقللو منها كلما كنا غا نزيدو عليه الزبدة ولا الفروماج ولا الكونفيتور.
وكا ينصحو الخبراء كلهم بأننا نصايبو الخبز فدارنا، باش نكونو عارفين شنو درنا فيه. إما بالطريقة التقليدية، أو بشراء العجانة بالنسبة للناس اللي فالمستطاع ديالهم.
