دانكن كا تحل أول مرة فالمغرب

أخيرا، ولات عندنا فالمغرب علامة دانكن المشهورة فالمريكان وفالعالم كلو بالقهوة والمخبوزات. “الفرانشيز”، اللي شراتها شركة “الآمار”، حلات الفرع ديالها لول فالرباط، فالمركب التجاري “الرباط سانتر”، وناوية تحل فروع أخرى جديدة فبزاف ديال المدن المغربية.

المقهى ديال دانكن ف”الرباط سانتر”، كا تقدم للزبائن أنواع مختلفة ديال القهوة الجيدة و”الإسبريسو” وأتاي و”القهوة لاطي” و”كابوتشينو”، ومشروبات الشوكولا ومخبوزات بحال “الدونتس” والساندويشات الخفيفة على الطريقة الأمريكية.

واللي بغا يعرف المزيد على العلامة، كا نقولو ليه باللي تأسست عام 1950 فالمريكان، وولات فظرف شهور معروفة ومشهورة بفضل الجودة ديال القهوة ديالها، سوا سخونة ولا باردة، ولا القهوة اللي ما فيهاش الكافيين أو القهوة بنكهات مختلفة، إضافة إلى جودة “الدونتس” و”البيغل” و”كيك المافين” اللي مشهورين فالمريكان. وهي اليوم عندها أكثر من 12600 فرع في 40 دولة في العالم.