“ريبيلاتو” ديال باريس غادي يحل فكازا

مطعم ريبيلاتو المشهور فباريس، واللي كا يجيو ليه بزاف ديال الشخصيات المشهورة بحال بريجيت ماكرون والممثل جون رينو وغيرهم، قرر يحل فمدينة الدار البيضاء، نهار الخميس اللي جاي.

هاد المطعم، غادي يقدم للزبائن ديالو، تجربة أكل ممتعة واستثنائية، ومية فالمية طاليانية، حيت غادي يستورد جميع المنتجات ديالو مباشرة من الطاليان، حتى من “الموزاريلا” غادي يجيبها من تماك. وكا يقترح على عشاق المطبخ الإيطالي، مجموعة من الوصفات والأطباق الكلاسيكية بحال “الريزوتو” و”السباغيتي” وجميع أنواع “ليباط”، إضافة طبعا إلى “البيتزا نابوليتان” على الطريقة التقليدية. وغادي يقدم النبيذ الإيطالي طبعا.

هاد الفرع الجديد ديال المطعم الإيطالي اللي حل فباريس ف1985، واليوم غادي يحل بكازا بفضل الشراكة ديالو مع “ياب هولدينغ” ديال يحيى اعبابو، غادي يكون فبلاصة المطعم القديم اللي كان سميتو “ميركاتو بوبولاري”، وبالضبط ف19 شارع فرانش كومتي بحي غوتيي الراقي بالعاصمة الاقتصادية.