آراك للشوا يا الهوا

بزاف ديال الناس كا يموتو على الشوا ديال اللحم حيت كا يجي بنين وشهي على الفاخر. والشوا كا يكثر فالعيد الكبير ولكن حتى فالصيف، حيت خفيف وكا يجي معاه الهواء الطلق، إما فالجردة والتيراس أو فوق السطوح. ولكن، بزاف ديال الناس غالطة وكا يحساب ليها غير آجي وشوي. لا… الشوا عندو القواعد ديالو.

أحسن حاجة قبل ما نشويو، نديرو اللحم مع ليقامة ديالو (بزار وملحة وتحميرة وربيع وشوية ديال الزيت البلدية)، ونزيدو عليه قطع ديال البصلة، ونخليو الخليط يتشرب لمدة ساعات قبل ما نبداو نشويو. منين نبداو العملية، نحاولو ما نخليوش اللحم فوق الشواية بزاف حتى يقصاح، خاص نقابلوه باش ما يزندش فوق العافية ونقلبوه مرة وحدة فقك. وخاص يكون الحجم ديال القطع ديال اللحم متساوي، ماشي شي قليل شي كثير، ومن الأفضل ما يكونش منو للفاخر خاص يكون شوية بعيد عليه. ملي تساليو من الشوا من الأفضل تحطوه فوق البابيي ألومنيوم قبل ما تاكلوه. وآراك للشوا يا الهوا.