الحكومة باغية تحمي “مول الحانوت” من “بيم”

رياض مزور، وزير الصناعة والتجارة، قال فتصريح ليه قدام مجلس النواب، باللي الحكومة كا توجد واحد مشروع قانون فيه بزاف ديال الإجراءات اللي غادية تحمي “مول الحانوت” من المنافسة الشرسة ديال محلات “بيم” التركية، اللي منتشرة بحال الجراد فالأحياء الشعبية وغير الشعبية فجميع المدن المغربية.

ومن بين الإجراءات اللي غادية تقدر تديرها الحكومة، تحدد وقت معين تسد فيه المتاجر الكبرى باش تخلي الفرصة لموالين البيسريات يربحو شوية وينتعشو بالليل، وتعطيها واحد المساحة معينة ما تفوتهاش وتراجع السلعة اللي كا تبيعها.

الحكومة سبق ليها فعهد الوزير السابق مولاي حفيظ العلمي، طالبات “بيم” باش تكون 65 في المائة من المنتجات اللي كا تبيع، مغربية، وهددها بالسدان إيلا ما لتازماتش بهادشي.

عدد المتاجر ديال العلامة التركية كا يتجاوز 500 متجر فالمغرب، وكا توظف 3000 شخص من اليد العاملة المغربية، ومعروفة بسياستها الفعالة في تخفيض الأسعار وبالعروض ديالها الأسبوعية اللي كا تعرف إقبال كبير من المغاربة.