فتات الشطبا وطايب وهاري والطون والحرور … عند “الدوار”

فتح واحد المطعم، سميتو “الدوار”، ففضاء “إم أفنيو” الجديد اللي حل فمراكش. هاد المطعم متخصص في الطبخ المغربي الأصيل والشهيوات المغربية التي لا يعلى عليها.

هاد المطعم كاين فالشرفة ديال مسرح “ميدين” الجديد، فالهواء الطلق، وكا يقدم للزبناء ديالو جميع الأصناف التقليدية ديال الأطباق والحلوى المغربية، وحتى بعض “التويشيات” البسيطة اللي كبرنا بيها، ويمكن تذكرنا بالطفولة، بحال الطون والحرور وطايب وهاري والبيصارة والكبدة المشرملة وفتات الشطبا، واللي تقريبا انقارضات من الموائد المغربية، وقليل المطاعم اللي كا تصاوبها.

“الشهيوات” اللي كا يقدمها المطعم الجديد، كا يشرف عليها الشيف عصام الراشي، اللي سبق ليه خدم فمطعم “لو فوكيت”، واللي غادين يخدمو معاه عيالات جايات من العروبية ديال النواحي، واللي كا يتقنو الشهيوات المعروفة فالمطبخ المغربي.

ومن الحوايج الزوينة اللي غادي يديرها المطعم، هو أنه غادي يستاعن بالمنتجات المحلية اللي كا تصاوبها العيالات ديال التعاونيات اللي كا تنتج الزيت والسميد والتوابل وكا تزرع الخضرة.

المطعم غادي يحل يوميا من الطناش ديال النهار حتى الطناش ديال الليل. واللي بغا يحجز باش يجرب ماكلتو ما عليه غير يتصل بالرقم 06 36 62 16 16.