اللي كا يبغي ماكلة “عش السنونو” عليه ب”شي شين”

خبر زوين جابو موقع “لماكلة” لبيضاوة اللي كان عزيز عليهم ياكلو فمطعم “لو ني ديرونديل”  (عش السنونو)، اللي كان فشارع الزرقطوني، قبل ما يتهدم هادي شي عام تقريبا. نفس الكاليتي ديال الماكلة الفيتنامية اللي كان متخصص فيها هاد المطعم الأسطوري، تقدرو تلقاوها فمطعم جديد حل فبوسكورة، وتابع لمجموعة كازا خوسي الإسبانية. المطعم سميتو “شي شين”، على اسم الشاف ديالو شين، واللي كان مورا افتتاح مطعم “عش السنونو” ومطاعم أخرى فكازا متخصصة فالمطبخ الآسيوي بحال “الطونكينواز”، واللي ممكن نعتابروه أيقونة ديال الأكل الآسيوي، اللي متخصص فيه هادي 40 سنة.

المطعم الجديد كا يقترح على الكليان ديالو العديد من الأكلات الآسيوية بحال اللحوم اللي مصاوبة على الطريقة اليابانية أو “الووك” ولا “المارميت” اللي طايبة على البخار…