“البيت اللبناني” جاب الجديد… الأنترناسيونال وخدمة التريتور

مطعم “البيت اللبناني”، اللي متخصص فالشهيوات الشامية واللبنانية، قرر باش يطور المنتوجات ديالو ويزيد يستقطب الزبناء، يدير حتى الماكلة أنترناسيونال، مع الحفاظ على اللمسة اللبنانية ديما اللي خاصها تكون ملموسة فالبنة. مثلا، المطعم كا يقدم “السومون” ب”الماريناد” مصاوبة على الطريقة اللبنانية، أو “تارتار السومون” بالصلصة اللبنانية التقليدية التي فيها الحامض وزيت الزيتون والثوم ودبس الرمان…

المطعم، اللي كا يملكو الفنان اللبناني رياض العمر، زاد واحد الخدمة جديدة ديال “التريتور”، وبدا كا يحضر طوابل كا تبدا من 10 أشخاص لربعين شخص، للناس اللي عندهم مناسبات زوينة. الطبلة ديال “البيت اللبناني”، غادي تكون فيها تشكيلات منوعة ديال الأطباق اللبنانية الشهية والمعروفة، بحال “المزات” و”الشاورما” على طريقة “الرول سوشي” و”الكبة” والفطائر و”السمبوسكي”. المطعم ولا تا يصاوب أيضا “الكنافة الروايال”، للمناسبات، واللي هي كنافة (حلويات شامية لذيذة) ياكلو فيها 8 ديال الناس، بحال إيلا قلتي بسطيلة ديالنا. المطعم ولا تا يدير كذلك “الكنافة العثمانية”، بالإضافة إلى “كنافة” القشدة بالجبنة، اللي معروف بيها.