الصقالة… الفطور البلدي ديال الصح والعمل

اللي بغا يفطر صباح ديال الويكاند مع عائلتو كا نصحوه بفطور ديال الصقالة، واللي هوا أحسن حاجة كا يقترحها هاد المطعم على الزبناء ديالو. “الماكلة” كا ينصحكم بالفطور ديال الصقالة ديال جوج ديال الناس، واللي ثمنو تقريبا 200 درهم مع البوربوار.

هاد الفطور الشهي، بلدي وكا يقطر باللذة. فيه براد كبير ديال أتاي (أو جوج صغار) وفيه جميع أنواع الزيوت، زيت أركان وزيت أملو وزيت الزيتون وفيه العسل والكونفيتور، وفيه الزبدة بلدية، وفيه الشفنج والمسمن والبغرير، والخبز ديال الدار. وفيه الزيتون كحل والزيتون خضر… ونزيدكم واحد الطويجين صغير ديال البيض بالخليع لا يعلى عليه، وجوج كيسان صغار ديال عصير الليمون وعصير اللوز منسم بالما زهر، وسالاد فروي على حساب الفواكه ديال السيزون. يعني فطور كامل متكامل يبقى شاد ليك ساعات طويلة. خاصة إيلا كنتي مخرج الوليدات وغا تجري معاهم وعندك تمارة معاهم. ويقدر يكون فطور وغدا فنفس الوقت إيلا خديتيه معطل مع ديك الحداش.

جربوه ما غاديش تندمو. وفوق هادشي المنظر فين غادي تفطر غزال ومفوج فمطعم كا تشم فيه ريحة التاريخ. الناس اللي عندهم ضيوف أجانب ممكن يجيبوهم لهاد المطعم اللي كا يفتخرو بيه كازاوا لحرار.