روفتوب الدوج… بلاصة محترمة للأفتر وورك ولا البرانش

الناس اللي كا تبغي بلاصة زوينة وهادئة وكلاس. فيها الماكلة واعرة والكاس نقي بثمن زوين، يمشي للروفتوب ديال أوتيل “الدوج” اللي كاين فالسونتر فيل. المكان كلو آر ديكو، وكا يجيو ليه غير الناس الذواقة، خاصة من الأجانب. فيه بزاف ديال النجالزة والفرنساويين والسبانيول. فيه كذلك الكوبلات بزاف مزوجين ومصاحبين واللي مع وليداتهم كاع. الروفتوب كا يطل على منظر جميل ديال مدينة الدار البيضا، وكا يرجعك لواحد الزمن زوين كانت فيه هاد المدينة تنافس مدن كبيرة بحال نيويورك. فالماكلة كاين بزاف ديال الأطباق شهية وتغري بالأكل. جربنا منها هاد الساعة الكروفيت بيل بيل ومقيلة ديال البولب أ لا بروفونسال. ماشي واو، ولكن خفيف ظريف بالنسبة للناس اللي كا تبغي تاكل خفيف أو ما كا تقدرش تاكل وتغلق مع الطاسة. المكان ما كبيرش بزاف وخاص تريزيرفي قبل ما تجي، خاصة مع هادشي ديال كورونا والتباعد. عندهم أطباق أخرى بالطون والحمام والحوت. عندهم البايلا. عندهم حتى الكسكسو نهار الجمعة. كا يديرو الفطور ديال الصباح تا هوا. بلاصة زوينة للأفتر وورك والبرانش ديال الويكاند تا هوا. تا نعاودو نرجعو ونعاودو ليكم على الشي لاخر.