سناك السعادة… اسم على مسمى

من أحسن وأقدم السناكات اللي كاينة فمدينة الدار البيضاء، اللي كا تقدم أجود أنواع الساندويشات فالعالم. بسيط وعادي وتقليدي فيه البصلة وماطيشة والحار. ما فيه لا صوص خضرا لا صوص بيضا لا فريت. من الشواية للخبز. السناك اللي معروف ففيردان عند الناس ديال كازا ما كا تلقاش فيه بلاصتك لا بنهار ولا بالليل. كازاوا كلهم كا يتكبو عليه حيت الجودة، واخا السناك ما مفركسش وما كا يزعموش يدخلو ليه العيالات. واخا دارو سناك السعادة الجديد فبيلفيدير، ديال العائلات، احسن منو من ناحية الديكور والمنظر والنقا، كا تبقى البنة ديال السعادة ديال فيردان لا يعلى عليها، منذ عشرات السنين، خاصة ساندويش الطيحان، مع كوكا ديال الجاج. كا تحس معاهم بسعادة حقيقية نيت.