البايلا ديال ساني بيتش… أحسن ما كاين فشواطئ دار بعيز

ليبلاج بريفي (الشواطئ الخاصة) ديال دار بوعزة كلهم زوينين ومفوجين وفروجيين وماكلتهم كا يختلف المستوى ديالها من بلاصة لبلاصة. وكلهم تقريبا كا يديرو البايلا الإسبانية، حيت كا يكثر عليها الطلب فالصيف وكلشي كا يبغيها حيت خفيفة ظريفة وجايا مع الشمش والبحر. ولكن البايلا ديال ساني بيتش، لا يعلى عليها. محرقة ومعلكة ومشربة مزيان وعامرة بالدجاج والفروي دو مير وبوزروك ومختلف أنواع الحوت. أما إيلا زدتي عليها واحد لاصوص حارة كا يقدموها معاها، فما تشبعش منها نهائيا. من فوق هادشي ثمنها مزيان بالنظر للكمية الكثيرة ديال المقيلة. بايلا ديال شخص واحد يقدرو ياكلو فيها ثلاثة الأشخاص، وما كا يتعداش الثمن ديالها 150 درهم. عكس بلاجات أخرى كا توصل البايلا عندهم ل400 درهم وماشي بجودة هاديك اللي فساني بيتش.