“أحمد شيف”… النيفو هابط والأثمنة باقا طالعة

المطعم التركي أحمد شيف، اللي كاين فالمعاريف، واللي كان السرابس والزحام عليه، فاش يالاه حل، هبط النيفو ديالو بواحد الشكل كبير. موقع “الماكلة”، فآخر زيارة دارها لهاد المطعم، لقا باللي الجودة ديال اللحم اللي كان كا يتميز بيها المطعم، قلات بزاف. وولا كا يشبه أي لحم كا تاخدو فمطعم عادي، ماشي بحال اللحم اللي كا يكون طايب على الطريقة التركية وكا يكون متميز بالطراوة والبنة ديالو الاستثنائية. المتبل كذلك، ناقص بزاف فالبنة وداير بحال شي دانون مسوس ديال صحاب الريجيم. أما بالنسبة للسيرفيس فعيان بزاف. كا تحط الماكلة قبل من الخبز. والطبق ديال اللحم كان بارد. والقائمة ديال الحلويات ما كايناش كاملة. ويلا طلبتي الما، كا تبقى ربع ساعة عاد كا يوصلك. المهم داكشي ما بقاش كيفما كان فالبدايات. المشكل أن “أحمد شيف”، غالي، وماشي فمتناول الجميع. ورغم أن النيفو هبط بقا محافظ على نفس الأثمنة المرتفعة. اللي كلا فيه يامات العز بلا ما يعاود يجربو، خاصة أن المنافسة كاينة اليوم مع افتتاح مطاعم أخرى تركية، غادي نمشيو نجربوها ونردو عليكم لخبار.