كازا خوسي… الشواية والحوت والنبيذ الأبيض

اللي كا يبغي الحوت عليه بكازا خوسي اللي فشارع المسيرة، وبالضبط فزنقة أميمة السايح. المطعم ديالها، اللي تحل فبلاصة مطعم “لو كونتوار ديزارين”، فيه مختلف أطباق السمك بجودة مضمونة وثمن مناسب. ممكن إيلا كنتو “كوبل” أو عائلة، تجربو بزاف ديال الأطباق، شوية شوية من الحاجة. موقع “لماكلة” كا ينصح بالشواية ديال السردين التقليدية، بالنسبة للناس اللي كا يبغيو هاد النوع من الحوت مشوي. بالنسبة للسلطات، كاينين بزاف ديال الأنواع ولكن ما كاينش أروع من السلطة ديال الطون والبصلة، خطيرة واخا بسيطة. واخا تبغي تصايب بحالها فالدار ما تصدقش ليك. كاين طبعا الكروفيت بيل بيل بالثومة والزيت البلدية… جميل جدا… وكاين “الكلاماريتوس” المقلي اللي جربناه وكان فمنتهى البنة. وزيد عليه أيضا الطورتيا الإسبانية بالكروفيت. وكاينين أطباق أخرى ديال الحوت، إما مقلي أو “بلانشا”، إضافة طبعا إلى “البايلا” و”ليزويتر” و”ليمول”… وطبعا هاد الأطباق كلها لا تكتمل بدون قنينة محترمة ديال النبيذ الأبيض اللي كا يقدم المطعم أجودها وبأثمنة مناسبة جدا.