آش وقع ل”مقيلة” الدوفان؟

الناس اللي كا تعرف مطعم “الدوفان” اللي حدا البازارات ديال المدينة القديمة للدار البيضا، كا يعرفو أنه معروف بجودة السمك ديالو. اللي كا يبغي ياكل الحوت كا يقصد هاد المطعم اللي تأسس في 1957 وباقية السمعة ديالو مزيانة لحد اليوم. واخا الجودة ديال بعض الأطباق ديالو تأثرات فالزيارة الأخيرة اللي دارها موقع “لماكلة” للمطعم الشهير، واللي مولاه الفرنساوي ولا حريص على “البافيت” اكثر من الحرص على الجودة. خدينا “المقيلة” اللي كا ياخدوها الزبناء الأوفياء ديال الريستوران، واللي ما يتميز بيها بزاف، ولكن الطريقة باش مصاوبة ماشي هيا هاديك، فيها بزاف ديال الما وطالقة فيها مطيشة بزاف، في حين كانت كا تكون معلكة كيفما كا نقولو ومشربة. السردين مشوي تا هوا ما كانش اختيرا فمحلو لأن المطعم جايب السردين الكبير اللي الأغلبية ديال العشاق ديالو ما كا يبغيوهش وكا يفضلو عليه السردين ديال الشمال حيت صغير وبنين بزاف. أما طبق “البايلا”، فجابوها لينا مزيتة واخا فيها شوية ديال المذاق والبنة. هادشي ما موالفش فهاد المطعم المعروف بالجودة ديالو. ياكما أثرات عليه الإغلاقات بسبب كورونا. على أي، غا نعاودو نمشيو لهاد المطعم فتجربة جديدة ونشوفو واش هادشي اللي وقع ليه طارئ وعابر ولا ما زال مستمر.