بيكاسو… الطاباس بنينة والطاسة رخيصة

مطعم بيكاسو، اللي جا فشارع السكتاني، كا يقدم للزبائن ديالو طاباس (منها قطعة ومنها ماكلة) زوينة وبنينة. موقع “لماكلة” ذاق منها وكا يقترح عليكم الكروفيت “بيل بيل” بالتومة وزويتة بلدية والربيع من داكشي الرفيع، أو الكروكيت المقرمش ديال الفروماج والدجاج، أو “لينيم” بالصوجا على الطريقة الصينية… شهوة منهم. بالنسبة للأطباق، الموقع كا يقترح جوج أطباق خطيرين ذاقهم، هوما السباغيتي بالسومون أو البيتزا بالطون والبيض.

المطعم ال pub بيكاسو، فضاء مثالي للغدا أو ل”الأفتر وورك”. فبالإضافة للماكلة والطاسة اللي كا يوفرها بأثمنة معقولة، لعلامات جديدة ديال النبيذ أو البيرة، كا يتميز بالديكور ديالو المريح وبحسن التعامل ديال “السطاف” اللي كا يشرف عليه، وعلى راسهم مول المحل مومو، اللي كا ينشر واحد لامبيونس خاصة كا يفتقدوها الكليان إيلا ما كانش، سورتو فماتشات “الديربي” الكازاوي، اللي كا يتجمعو فيها “الإخوة الأعداء”، بكل روح رياضية، واخا مومو رجاوي مخزز.

حاجة واحدة أخرى مهمة جدا، ملفتة للنظر بزاف فهاد المطعم، هي نظافة المراحيض، اللي وقتما دخلتي ليها، كا تلقاها كا تشعل بالنقا.