سابواي حل فالكورنيش ولكن بلا حليليفة

العلامة الميريكانية المشهورة ديال الساندويشات “سابواي” حلات فالكورنيش ديال كازا. هاد العلامة كا تقدم للزبناء دياولها شكيلات مختلفة ديال الساندويشات المصاوبة على الطريقة الأمريكية، باللحم ولا الدجاج ولا الطون ولا الكفتة، وكا تعطيك حرية اختيار داكشي اللي بغيتي تدير معاها بنفسك، فالخضرة والتوابل والبهارات وليصوص وباقي المحتويات الأخرى، ولكن للأسف، ما كا تديرش فالمغرب الساندويش ديال الحلوف (ham) اللي هوا أبنن وألذ ساندويش معروفة بيه هاد العلامة.

“سابواي” كا تدير واحد الخبز ديالها خاص، أو “الوراب” (بحال خبز الشاورما)، وكا تحاول تقدم محتويات صحية فالساندويش ديالها، للناس اللي ما كا تبغيش الكالوري بزاف، وفعوض الفريت التقليدي كا تقدم للزبون ديالها البطاطا مصاوبة فالفران. وما كا تديرش لا كلاص فالمحلات ديالها، ولكن واخا هاكاك كا تقدم المشروبات الغازية اللي هيا غير صحية نهائيا.

“لماكلة” مشات تجرب “سابواي”. المحل مفوج وكبير ومريح، والساندويش بنين واخا ماشي بنفس البنة ديال هاداك اللي كا تاكلو فالمريكان، حيت مصاوب ربما بنسبة كبيرة ديال المحتويات المغربية. غير هوا الأثمنة غير مشجعة نهائيا. الساندويش الصغير فايت 50 درهم، والكبير، اللي سماه الموقع ديالنا “التمساح”، كا يوصل حتى ل82 درهم. واخا الساندويشات مهورة وكا تشبع، إلا أن الثمن ديالها ماشي ديال وجبات “الفاست فود”، وما كا يسمحش بمنافسة علامات أخرى قريبة من “سابواي” وأرخص منو وترسخات فالثقافة ديال المغاربة بحال ماك دونالد.