لو سيركل… السخينة اللذيذة والنبيذ “الكوشير”
اللي كا يبغي طبق السخينة، أو دفينة، اللي معروفين بيها اليهود المغاربة، ما عليه غير يقصد مطعم “لوسيركل دو لاليانس”، اللي جا فشارع عبد الرحمان الصحراوي وسط المدينة ديال كازا (سونتر فيل)، باش يمتع راسو بهاد الماكلة اللذيذة اللي بزاف ديال المغاربة توحشوها، ملي مشاو ليهم صحابهم وجيرانهم اليهود، من سنوات طويلة.
هاد المطعم، اللي كا يشرف على الإدارة ديالو صديقنا دانييل ومراتو، كا يوجد جميع الشهيوات المغربية والشلايض، على الطريقة التقليدية القديمة، وبأثمنة مناسبة. كل نهار كا تلقى فيه شهيوة معينة، من الكرعين والتقلية حتى للدجاج بالزيتون وطاجين اللحم بالبرقوق، إلى جانب تشكيلة ديال المقبلات المغربية بحال خيزو والبسباس والبطاطا بالبصلة والعدس واللوبيا وزيد وزيد…
هاد المطعم، عكس ما كا يعتاقدو بزاف ديال الناس، ماشي غير ديال اليهود، وكلشي ممكن يدخل ياكل فيه مسلمين ونصارى وتا اللي ما عندو لا دين لا ملة. أما بالنسبة للسخينة، فمن الأفضل تكونو مجموعة فيها بزاف ديال الناس، وتطلبوها قبل باش يصاوبوها على حقها وطريقها.
المطعم كا يقدم غير النبيذ الحلال، أو “كوشير” اللي كا يشرف عليه الحزان ديال اليهود، قبل ما يتحط فالطبلة. هاد النبيذ لذيذ بزاف والجودة ديالو لا يعلى عليها.
إلى جانب الأثمنة المناسبة وجودة الأكل، كاين واحد الاستقبال زوين بزاف من عند خوتنا اليهود المغاربة دانييل ومراتو، ومن الطاقم اللي كا يخدم معاهم، واللي فيه مغاربة مسلمين. 
