شهيوات لبنانية على حقها وطريقها فالبيت اللبناني
بزاف ديال الناس ما كا يبغيوش الماكلة اللبنانية. إما لأنهم ما ذاقوهاش فالبلد الأصلي ديالها، أو كانت عندهم تجارب خايبة مع “سناكات” أو مطاعم “الشاورما” اللي منتشرة بشكل كبير عندنا، واللي غير كا تكور وتعطي للعور. اللي بغا يغير نظرتو على الأكل اللبناني ويتذوق الشهيوات ديالو على أصولها، يمكن لو يمشي لمطعم “البيت اللبناني”، اللي كاين فشارع سقراط، واللي مولاه هو رياض العمر، المغني والفنان اللبناني المقيم بالمغرب سنين ومنين هادي. هاد المطعم عندو أطباق كثيرة متنوعة من حيث المحتوى ومن حيث الثمن تا هوا. كاينين المزات السخونة والباردة من ورق العنب والمتبل والتبولة والحمص ونتا طالع…. كاين شيش طاووق والمشويات على الطريقة اللبنانية… كاينة المحمرة… كاينة الشكشوكة… كاينة عرايس الكفتة… كاين خبز بزعتر… كاينة الشاورما على حقها وطريقها… كاين الكبسة… فالديسير يمكن ليكم تاخدو كنافة ولا مهلبية… الناس اللي كا تبغي العصير يمكن تاخد لامونادة بالحامض… ومنين تعركوها قص… تقدرو تهضمو بواحد مولاتي القهوة العربية ديال الفريع. هاد المطعم كا يصلاح بزاف للعائلات وللناس اللي كا تبغي تاكل فمطعم راقي ونقي وما فيهش الشراب.
إضافة إلى الماكلة البنينة، الكادر ديال “البيت اللبناني” مريح جدا وزوين بزاف. اللوينات والديكورات كا تخليك تحس بحال إيلا راك فبيروت، خاصة أنك كا تاكل على نغمات الموسيقى ديال فيروز أو ملحم بركات. يا سلام.
