لو كويستو… تا مغرابيت ولا كلاس
الناس اللي كا يبغيو الماكلة المغربية المأصلة، كا ننصحهم بواحد المطعم خطير كاين فالدرب اللوراني ديال المسرح الجديد ديال محمد السادس فالدار البيضا، حدا الولاية، سميتو “لو كويستو”.
المطعم مخصص فضاء مغربي مية بالمية فالفوقي ديالو. فيه الطاس والزليج والديكورات مغربية قديمة. وكلو صور كبيرة ديال الحسن الثاني اللي باين باللي صاحب المطعم مبهور بشخصيتو، خاصة أنه سبق ليه خدم مع المصور ديالو المفضل مرادجي.
هاد المطعم فيه جميع أنواع الشلايض المغربية الباردة والسخونة، من مطيشة والبصلة والخيار حتى للشيفلور والمخيخ والكبيدة المشرملة والذي منو…كاين أيضا السردين مشرمل بواحد الطريقة زوينة بزاف.
بالنسبة للأطباق الرئيسية، كلشي كاين… الكرعين… الهركمة… التريد بالحمام… الطاجين ديال الدجاج البلدي والزيتون والحامض… البرقوق… الطنجية على الطريقة البيضاوية… الكسكسو… البسطيلة ديال الدجاج والحوت كلها مطيبة بواحد الطريقة سبيسيال كا يوقف عليها مول المطعم نفسو، اللي كا يطبخ بواحد العشق والشغف كا يبان فالماكلة ديالو، واللي كا يتمتع بواحد لا كلاس والهيبة ديال الناس لقدام اللي ما بقينا شكا نشوفوهم بزاف.
المطعم معروف بكتف ديال الحولي محمر. كا يصاوبو مول المحل بطريقة “لم يأت بها زمان” كيفما كا يقول هو بنفسو. لأنه كا يصاوبو بالشحمة ديالو وما كا يديرش فيه الزيت.
اللي غادي يدخل ياكل فالمطعم يقدر يتفاجئ بأن الكمية قليلة اللي كا تحط. ولكن فالحقيقة كمية هيا هاديك بالنسبة للناس الذواقة اللي كا تبغي تتدوق شي حاجة زوينة ماشي تغلق اللي كان.
أما الخبز، فبلدي ديال الدار وكا يطيب داخل المطعم ومصاوب من الشعير والقمح. أتاي منسم معتبر أيضا خاصة إذا رفقتوه بواحد الفقاص فريد من نوعو، شخصيا عمرني كليت بحالو.
غادي نعاودو نرجعو لهاد المطعم ونختارو منو أطباق اخرى نهضرو ليكم عليها فمناسبة أخرى.
