أوتيل راسين فمراكش… ماكلة مزيانة بأثمنة تناسب الأزمة

أوتيل راسين اللي فمراكش، داير واحد الأثمنة زوينة ومناسبة بزاف فالماكلة، بالنسبة لأوتيل 4 نجوم. مثلا بالنسبة لبيتزا عادية مارغاريتا، ما كا يفوتش الثمن ديالها 25 درهم، وفيها البنة ومصاوبة مزيان. نفس الشي بالنسبة للساندويشات اللي كا تختلف الأثمنة ديالها على حساب المكونات اللي فيها، وكذلك بالنسبة ليباط والأطباق الأخرى ديال الدجاج واللحم والطويجنات، اللي كا تبقى مناسبة بزاف.

“الماكلة” زار لوتيل، اللي داير أثمنة مناسبة حتى فليشامبر، اللي ما كا تفوتش 350 درهما لشامبر “سينغل” و420 درهما لشامبر “دوبل”، مع الفطور، وحماق على الطاكوس اللي كا يصاوبو الشيف ديال راسين. خطير جدا من ناحية البنة، ومهور ما تقدرش تكملو، وياكلو فيه جوج الناس ولا ثلاثة كاع إيلا كانوا ماشي غلاقة. “الماكلة” حماق أيضا على لي غلاس، بنان وناقصين بزاف من السكر ومصاوبين بواحد الطريقة مختلفة وكا يتصاوبو بواحد المقادير خاصة جدا، غا نكتاشفوها مرة أخرى منين نزورو الشيف ونديرو معاه شي لقاء.