سافور دو بالي… كا تاكل احسن من دارك

اللي كا يبغي ماكلة ديال الدار على حقها وطريقها، كا نقترحو عليه فموقع الماكلة مطعم “سافور دو بالي” فالدار البيضا. مطعم مغربي بامتياز من الديكور ديالو حتى للشهيوات ديالو. ماشي كا يقدم ليك ماكلة بحال ديال الدار ولكن احسن منها كاع. الناس اللي خدامين وما كا يقدروش ياكلو كسكسو ديال الجمعة فديورهم، يقدرو يمشيو لهاد المطعم بعينيهم مغمضين. البنة والجودة مضمونة. واخا كا تبان الكمية قليلة ولكن راها هيا هاديك قد قد، وكا تقدر تشبع قبل ما تكمل الطويجين ديالك. وحتى بالنسبة للأثمنة فراها فالمتناول. كسكسو باللحم غنمي ولا بكري ولا دجاج طاوسي مع كاس ديال اللبن ب70 درهم.

المطعم كا يقدم ليزونتري مغربية تقليدية، بحال العدس بالخليع ولا اللوبيا البيضة ولا فول كناوة اللي ما بقاوش العائلات كا يصاوبوه من قديم الزمان، بسعر ما كا يتعداش 35 درهم. كاين شلاضة منوعة ديال الزعلوك وليزيبينار والتكتوكة، وشلاضة مغربية عادية بالبصلة والخيار ومطيشة. كاينين الشلايض ديال صحاب الريجيم بحال ديال مطيشة والجبن والقزبر وشلاضة ديال الخيار والزعتر وشلاضة ديال خيزو محكوك مع الليمون والقرفة… كلها بثمن 40 درهم.

كاينين البريوات والبسطيلات صغار ديال الحمام والدجاج والحوت من 45 تال 55 درهم، وكاينين الطواجن ديال التقلية والكبدة والمخ واللسان والهركمة ب65 درهم. وكاين حتى طاجين بنين باللفت والبكري واخا هاد الخضرة مظلومة عندنا مسكينة وحتى فكسكسو ما كا ناكلوهاش غير كان حطوها فوق الطعام.

اللي كا يبغي الحوت، كا نصحو بطاجين ديال الكويرات ديال الميرنا ولا ديال السردين يا سلام بلا ما نهضرو على الرفيسة والسفة المردومة… يا سلام.

“سافور دو بالي” كا يدير حلويات مغربية أصيلة وأتاي ديال النفس وكلشي الشهيوات كا يقدموها بالخبز ديال الدار.

الناس اللي جا عندهم شي ضيف براني وبغا يديه لشي مطعم باش يتذوق الماكلة المغربية ديال بصح، ما يترددش ويديه ل”سافور دو بالي”، واخا عندهم السرفيس كا يتعطل بزاف، وهاد ليامات الأخيرة كثر عندهم الذبان بزاف. ولكن اللي بغا البنين يصبر لقريص الدبيبين.